On military service in the Republic of Albania

Lloji: Ligj

Fletore Zyrtare: nr. 64, datë 2003-08-04

LIGJ

Nr.9047, datë 10.7.2003

PËR SHËRBIMIN USHTARAK NË REPUBLIKËN E SHQIPËRISË

Në mbështetje të neneve 78, 81 pika 1, 83 pika 1 dhe 166 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Ky ligj përcakton rregullat për kryerjen e shërbimit ushtarak në Republikën e Shqipërisë, të drejtat, detyrimet dhe përgjegjësitë e shtetasve, të organeve shtetërore e subjekteve private për mobilizimin dhe shërbimin ushtarak.

Neni 2

Përkufizime

Në zbatim të këtij ligji, termat e mëposhtëm kanë këto kuptime:

1. “Mobilizimi ushtarak” është detyrimi ligjor i shtetasit, person fizik e juridik, për të marrë pjesë ose për të siguruar plotësimin e njësive e reparteve të strukturave ushtarake me personel, materiale, teknikë, kafshë, automjete e mjete të tjera të nevojshme.

2. “Shërbimi alternativ” është shërbimi i detyrueshëm, i cili kryhet në vend të shërbimit të detyrueshëm ushtarak aktiv nga shtetasi i cili, për arsye ndërgjegjeje, nuk pranon shërbimin me armë në Forcat e Armatosura.

3. “Shërbimi i detyrueshëm ushtarak aktiv” është detyrimi ligjor i shtetasve shqiptarë, meshkuj, sipas kritereve të përcaktuara me këtë ligj, për të kryer shërbimin me armë në Forcat e Armatosura.