ON CONSUMER PROTECTION

Lloji: Ligj

Fletore Zyrtare: nr. 84, datë 2003-10-07

LIGJ

Nr.9135, datë 11.9.2003

PËR MBROJTJEN E KONSUMATORËVE

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

PJESA I

OBJEKTI, FUSHA E ZBATIMIT DHE PËRCAKTIMET

Neni 1

Objekti

Ky ligj trajton të drejtat e konsumatorëve, marrëdhëniet ndërmjet konsumatorëve dhe prodhuesve, shitësve, furnizuesve, ofruesve të shërbimeve dhe organeve të kontrollit të tregut e të standardizimit. Qëllimi i tij është mbrojtja e shëndetit, mjedisit, sigurisë së jetës dhe të drejtave të tjera të konsumatorit, të sanksionuara me këtë ligj.

Neni 2

Fusha e zbatimit

Ky ligj rregullon marrëdhëniet ndërmjet konsumatorëve, nga njëra anë dhe prodhuesve, shitësve, furnizuesve e ofruesve të shërbimeve, nga ana tjetër, si dhe përcakton të gjitha detyrimet që rrjedhin nga marrëveshjet ndërkombëtare, që kanë lidhje me interesat e konsumatorit.

Neni 3

Përkufizime

Në kuptim të këtij ligji, termat e mëposhtëm kanë këto kuptime:

1. “Çmim për njësi malli” është çmimi përfundimtar për njësitë e njohura në treg si: kilogram, litër, metër, metër katror, metër kub dhe njësi të tjera, përfshirë edhe taksat.

2. “Çmim përfundimtar i shitjes së mallit” është çmimi i dhënë për njësinë e mallit ose për sasinë e tij, përfshirë dhe taksat.