ON THE INTERNAL CONTROL SERVICE IN THE PRISON SYSTEM

Lloji: Ligj

Fletore Zyrtare: nr. 45, datë 2005-06-14

LIGJ

Nr.9397, datë 12.5.2005

PËR SHËRBIMIN E KONTROLLIT TË BRENDSHËM NË SISTEMIN E BURGJEVE

Në mbështetje të neneve 78 dhe 83 pika 1 e Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti i ligjit

Ky ligj përcakton organizimin, funksionimin, detyrat dhe fushën e veprimtarisë së Shërbimit të Kontrollit të Brendshëm në Sistemin e Burgjeve (SHKBB).

Neni 2

Fusha e veprimtarisë së SHKBB-së

Fusha e veprimtarisë së këtij Shërbimi është parandalimi, zbulimi, dokumentimi dhe hetimi paraprak i veprimtarisë kriminale, të kryer nga punonjës të Policisë së Burgjeve, nga struktura të tjera të sistemit të Drejtorisë së Përgjithshme të Burgjeve dhe për çështje që lidhen me sigurinë në burgje.

Neni 3

Parimet bazë të veprimtarisë së SHKBB-së

Parimet bazë të ushtrimit të veprimtarisë së SHKBB-së janë ligjshmëria, profesionalizmi, objektiviteti, sekreti dhe pavarësia nga ndërhyrjet e parregullta në kryerjen e detyrës.

Neni 4

Autoriteti përgjegjës për veprimtarinë e SHKBB-së

1. Ministri i Drejtësisë ose personi i autorizuar prej tij është përgjegjës për mbikëqyrjen e ligjshmërisë dhe për ushtrimin normal të veprimtarisë së SHKBB-së.