ON THE RATIFICATION OF THE “MEMORANDUM OF UNDERSTANDING ON JOINT DEVELOPMENT OF THE BLACK SEA RING MOTORWAY”

Lloji: Ligj

Fletore Zyrtare: nr. 150, datë 2007-11-13

LIGJ

Nr.9820, datë 25.10.2007

PËR RATIFIKIMIN E “MEMORANDUMIT TË MIRËKUPTIMIT PËR ZHVILLIMIN E BASHKËRENDUAR TË AUTOSTRADËS UNAZË TË DETIT TË ZI”

Në mbështetje të neneve 78, 83 pika 1 dhe 121 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Ratifikohet “Memorandumi i mirëkuptimit për zhvillimin e bashkërenduar të autostradës unazë të Detit të Zi”.

Neni 2

Ky ligj hyn në fuqi 15 ditë pas botimit në Fletoren Zyrtare.

Shpallur me dekretin nr.5499, datë 1.11.2007 të Presidentit të Republikës së Shqipërisë, Bamir Topi

Shtojca IV e BS/SOM/R(2006)4

Draft

MEMORANDUM MIRËKUPTIMI

PËR ZHVILLIMIN E BASHKËRENDUAR TË AUTOSTRADËS UNAZË TË DETIT TË ZI

Qeveritë e shteteve anëtare të Organizatës për Bashkëpunimin Ekonomik të Detit të Zi (BEDZ), këtu të referuara si Palët:

me dëshirën për të forcuar bashkëpunimin e shteteve anëtare të BEDZ-it në promovimin e transportit ndërkombëtar rrugor të mallrave dhe të pasagjerëve, e konsideruar tejet e rëndësishme për zhvillimin ekonomik të tyre;

duke besuar se një plan i bashkërenduar i rehabilitimit dhe ndërtimit të rrugëve është thelbësor për vendosjen dhe zgjerimin e lidhjeve ndërmjet BE-së, vendeve të Detit të Zi dhe vendeve aziatike dhe nevojitet për të plotësuar kërkesat e trafikut ndërkombëtar në të ardhmen;