ON THE PRODUCTION, TRANSPORT AND MARKETING OF BIOFUELS AND OTHER RENEWABLE FUELS FOR TRANSPORT

Lloji: Ligj

Fletore Zyrtare: nr. 27, datë 2008-02-29

LIGJ

Nr.9876, datë 14.2.2008

PËR PRODHIMIN, TRANSPORTIMIN DHE TREGTIMIN E

BIOKARBURANTEVE DHE TË LËNDËVE TË TJERA DJEGËSE,

TË RINOVUESHME, PËR TRANSPORT

Në mbështetje të neneve 78 e 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Ky ligj synon promovimin e prodhimit dhe të përdorimit të biokarburanteve dhe të lëndëve të tjera djegëse, të rinovueshme, për zëvendësimin e nënprodukteve të naftës për sektorin e transportit, për të kontribuar në përmbushjen e angazhimeve të ndërmarra, në kuadër të Protokollit të Kiotos për ndryshimet klimatike, si dhe për të siguruar furnizimin e promovimin me burime energjetike të rinovueshme, nëpërmjet nxitjes e kultivimit të bimëve energjetike, për të mbrojtur mjedisin.

Neni 2

Fusha e zbatimit

1. Ky ligj zbatohet në veprimtaritë e prodhimit dhe të përdorimit të biokarburanteve dhe të lëndëve të tjera djegëse, të rinovueshme, të cilat, në formë të pastër ose të përzier, në përqindje të caktuar me nënprodukte të tjera të rafinimit të naftës bruto, përdoren në sektorin e transportit për motorë me djegie të brendshme.