On the approval of the Military Strategy of the Republic of Albania

Lloji: Ligj

Fletore Zyrtare: nr. 144, datë 2024-08-12

LIGJ

Nr. 83/2024

PËR MIRATIMIN E STRATEGJISË USHTARAKE TË REPUBLIKËS

SË SHQIPËRISË

Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Miratohet Strategjia Ushtarake e Republikës së Shqipërisë sipas tekstit që i bashkëlidhet këtij ligji.

Neni 2

Ligji nr. 72/2015, “Për miratimin e Strategjisë Ushtarake të Republikës së Shqipërisë”, shfuqizohet.

Neni 3

Ngarkohet Këshilli i Ministrave për nxjerrjen e akteve të nevojshme sipas përcaktimeve në Strategjinë Ushtarake të Republikës së Shqipërisë.

Neni 4

Ky ligj hyn në fuqi 15 ditë pas botimit në Fletoren Zyrtare.

Miratuar në datën 26.7.2024.

Shpallur me dekretin nr. 285, datë 2.8.2024, të presidentit të Republikës së Shqipërisë, Bajram Begaj.

STRATEGJIA USHTARAKE E REPUBLIKËS SË SHQIPËRISË

Mesazhi i ministrit të Mbrojtjes të Republikës së Shqipërisë

Strategjia Ushtarake (në vijim “SU”) e Republikës së Shqipërisë (RSH) është dokumenti themelor, i cili përcakton synimet, objektivat dhe drejtimin për funksionimin dhe zhvillimin e Forcave të Armatosura të Republikës së Shqipërisë (FARSH). Ajo është e bazuar në Kushtetutën e Republikës së Shqipërisë dhe në Strategjinë e Sigurisë Kombëtare (në vijim “SSK”) dhe e hartuar me ekspertizë gjithëpërfshirëse.