On the Albanian Geological Service.

Lloji: Ligj

Fletore Zyrtare: nr. 186, datë 2015-10-27

LIGJ

Nr. 111/2015

PËR SHËRBIMIN GJEOLOGJIK SHQIPTAR

Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Ky ligj ka për qëllim të përcaktojë parimet e organizimit, drejtimit, bazat dhe detyrat e Shërbimit Gjeologjik Shqiptar.

Neni 2

Objekti

Ky ligj rregullon marrëdhëniet ndërmjet Shërbimit Gjeologjik Shqiptar dhe sektorëve publik e privat, për nxitjen e shfrytëzimit të resurseve minerare në përfitim maksimal të publikut.

Neni 3

Përkufizime

Në këtë ligj me termat e mëposhtëm kanë këto kuptime:

1. “Ministria” është ministria përgjegjëse për veprimtarinë e shërbimit gjeologjik.

2. “Ministër” është ministri përgjegjës për shërbimin gjeologjik.

3. “Mineral” është çdo substancë në gjendje të ngurtë, të lëngët e të gaztë, që ndodhet në trajtë natyrore mbi ose nën tokë, në ose nën ujë, formuar prej proceseve gjeologjike.

4. “Mineral i dobishëm” është çdo substancë në gjendje të ngurtë, të lëngët e të gaztë, që ndodhet në trajtë natyrore mbi ose nën tokë, në ose nën ujë, formuar prej proceseve gjeologjike, që plotëson kushtet gjeologjike, minerare dhe teknologjike për përdorim në degë të ndryshme të ekonomisë.

5. “Ujëra nëntokësore” janë të gjitha ujërat e zonës së ngopjes, që formojnë shtresa, me dhe pa trysni.