ON THE TRANSITIONAL AND PERIODIC EVALUATION OF STATE POLICE, REPUBLIC GUARD AND INTERNAL AFFAIRS SERVICE STAFF AND COMPLAINTS TO THE MINISTRY OF THE INTERIOR

Lloji: Ligj

Fletore Zyrtare: nr. 39, datë 2018-03-20

LIGJ

Nr. 12/2018

PËR VLERËSIMIN KALIMTAR DHE PERIODIK TË PUNONJËSVE TË POLICISË SË SHTETIT, GARDËS SË REPUBLIKËS DHE SHËRBIMIT PËR ÇËSHTJET E BRENDSHME DHE ANKESAT NË MINISTRINË

E BRENDSHME

Në mbështetje të neneve 78 dhe 83, pikat 1 e 2, të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Ky ligj ka si objekt përcaktimin e parimeve, kritereve, procedurave dhe standardeve të vlerësimit kalimtar dhe periodik, si dhe të organizimit dhe funksionimit të organeve të vlerësimit për punonjësit e Policisë së Shtetit, të Gardës së Republikës dhe Shërbimit të Çështjeve të Brendshme dhe Ankesave në Ministrinë e Brendshme.

Neni 2

Qëllimi

Qëllimi i këtij ligji është vlerësimi kalimtar dhe periodik i punonjësve të Policisë së Shtetit, Gardës së Republikës dhe Shërbimit të Çështjeve të Brendshme dhe Ankesave në Ministrinë e Brendshme, për të siguruar institucione të forta e të besueshme, me profesionistë me integritet.

Neni 3

Përkufizime

Në këtë ligj termat e mëposhtëm kanë këto kuptime:

1. “Anëtar”, “bashkëpunëtor” dhe “i favorizuar” ka të njëjtin kuptim sipas përcaktimit të bërë në ligjin për të drejtën e informimit me dokumentet e ish-Shërbimit të Sigurimit të Republikës Popullore Socialiste të Shqipërisë.

2. “Ditë” janë ditë kalendarike, të cilat llogariten sipas rregullave të përcaktuara në Kodin e Procedurave Administrative.