ON OFFICIAL STATISTICS

Lloji: Ligj

Fletore Zyrtare: nr. 59, datë 2018-04-26

LIGJ

Nr. 17/2018

PËR STATISTIKAT ZYRTARE

Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Objekti

1. Objekti i këtij ligji është përcaktimi i kornizës ligjore për mbledhjen, përpunimin, zhvillimin dhe shpërndarjen e statistikave zyrtare në Republikën e Shqipërisë, parimeve statistikore, koordinimit të Sistemit Kombëtar Statistikor dhe çështjeve të tjera që lidhen me statistikat zyrtare.

2. Ky ligj përfshin të gjitha aktivitetet statistikore që zbatohen nga organet e ngarkuara për prodhimin e statistikave zyrtare, lidhur me fushat e parashikuara në shtojcën 1 të këtij ligji.

Neni 2

Përkufizime dhe shkurtime

1. Në këtë ligj termat e mëposhtëm kanë këto kuptime:

a) “Statistika” është informacioni sasior dhe cilësor, i përmbledhur dhe përfaqësues që karakterizon një dukuri kolektive në një popullatë të dhënë.

b) “Statistika zyrtare” është informacioni sasior dhe përfaqësues për situatën ekonomike, sociale dhe mjedisore në Shqipëri, i prodhuar nga INSTAT-i dhe agjencitë statistikore, në kuadër të programit të statistikave zyrtare.

c) “Prodhues të statistikave zyrtare” janë INSTAT-i, Banka e Shqipërisë dhe autoritetet e tjera publike, të autorizuara të prodhojnë dhe të publikojnë statistika zyrtare, sipas programit të statistikave zyrtare lidhur me fushat e përcaktuara në shtojcën 1 të këtij ligji.