ON THE ACCESSION OF THE REPUBLIC OF ALBANIA TO THE LOCARNO AGREEMENT “ON ESTABLISHING AN INTERNATIONAL CLASSIFICATION FOR INDUSTRIAL DESIGNS”

Lloji: Ligj

Fletore Zyrtare: nr. 97, datë 2018-07-02

LIGJ

Nr. 33/2018

PËR ADERIMIN E REPUBLIKËS SË SHQIPËRISË NË MARRËVESHJEN E LOKARNOS “PËR PËRCAKTIMIN E NJË KLASIFIKIMI NDËRKOMBËTAR PËR DISENJOT INDUSTRIALE”

Në mbështetje të neneve 78, 83, pika 1, dhe 121, të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Republika e Shqipërisë aderon në marrëveshjen e Lokarnos “Për përcaktimin e një klasifikimi ndërkombëtar për disenjot industriale”, sipas tekstit që i bashkëlidhet këtij ligji dhe është pjesë përbërëse e tij.

Neni 2

Ky ligj hyn në fuqi 15 ditë pas botimit në Fletoren Zyrtare.

Miratuar në datën 7.6.2018

Shpallur me dekretin nr. 10814, datë 25.6.2018 të Presidentit të Republikës së Shqipërisë, Ilir Meta

MARRËVESHJA E LOKARNOS

PËR PËRCAKTIMIN E NJË KLASIFIKIMI NDËRKOMBËTAR PËR DIZENJOT INDUSTRIALE

E nënshkruar në Lokarno, më 8 tetor 1968

dhe e ndryshuar më 28 shtator 1979

Neni 1

Themelimi i një Unioni të Posaçëm; miratimi i një Klasifikimi Ndërkombëtar

1. Vendet ku zbatohet kjo Marrëveshje përbëjnë një Union të Posaçëm.

2. Këto vende miratojnë një klasifikim të vetëm për dizenjot industriale (në vijim i referuar si “Klasifikimi Ndërkombëtar”).

3. Klasifikimi Ndërkombëtar përbëhet nga:

i. një listë e klasave dhe e nënklasave;

ii. një listë alfabetike e mallrave ku përfshihen dizenjot industriale, me një tregues të klasave dhe nënklasave ku ato kategorizohen;

iii. shënime shpjeguese.