On the Import, Export and Transit of Firearms, Their Main Components and Ammunition

Lloji: Ligj

Fletore Zyrtare: nr. 37, datë 2026-02-16

LIGJ

Nr. 13/2026

PËR IMPORTIN, EKSPORTIN DHE TRANSITIN E ARMËVE TË ZJARRIT,

TË KOMPONENTËVE TË TYRE KRYESORË DHE TË MUNICIONEVE

Në mbështetje të neneve 78 e 83, pika 1, të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Ky ligj ka për qëllim vendosjen e një regjimi të posaçëm kontrolli mbi importin, eksportin dhe transitin e mallrave të listuara, sipas shtojcës I bashkëlidhur këtij ligji, me qëllim shmangien e prodhimit të paligjshëm dhe trafikimit të armëve të zjarrit, të pjesëve e të komponentëve të tyre dhe të municioneve.

Neni 2

Objekti

Ky ligj ka si objekt përcaktimin e rregullave për dhënien e autorizimeve për importin dhe eksportin e mallrave të listuara, sipas shtojcës I bashkëlidhur këtij ligji, dhe marrjen e masave për importin, eksportin dhe transitin e armëve të zjarrit, të pjesëve e të komponentëve të tyre dhe të municioneve.

Neni 3

Përkufizime

Në kuptim të këtij ligji, termat e mëposhtëm kanë këto kuptime:

1. “Armë zjarri” është një armë zjarri sipas legjislacionit në fuqi për armët.

2. “Armë zjarri gjysmë të përfunduara” janë armët e zjarrit që nuk janë gati për t’u përdorur në mënyrë të drejtpërdrejtë, kanë formë apo strukturë të përafërt me armët përkatëse të zjarrit të përfunduara, përdoren, përveçse në raste të jashtëzakonshme, vetëm për të prodhuar armët përkatëse të zjarrit të përfunduara;