On the registration, mode of use and control of tourist and recreational vessels

Lloji: Ligj

Fletore Zyrtare: nr. 197, datë 2020-11-12

LIGJ

Nr. 127/2020

PËR REGJISTRIMIN, MËNYRËN E PËRDORIMIT DHE KONTROLLIN E

MJETEVE LUNDRUESE TURISTIKE DHE TË ARGËTIMIT

Në mbështetje të neneve 78 e 83, pika 1, të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

Neni 1

Qëllimi

Ky ligj rregullon mënyrën elektronike të regjistrimit, të përdorimit dhe të kontrollit të mjeteve

lundruese turistike dhe të argëtimit, të klasifikuara si të tilla nga shoqëria klasifikuese, me

kapacitet deri në 12 pasagjerë, pa përfshirë ekuipazhin e mjetit lundrues, me motor me fuqi mbi

30 kilovatë/orë (KW) ose 40.8 kuaj/fuqi (KF) dhe tonazh nën 500 grostonë (GT).

Neni 2

Fusha e zbatimit

1. Ky ligj zbatohet për mjetet lundruese turistike dhe të argëtimit, të klasifikuara si të tilla nga

shoqëria klasifikuese, me kapacitet deri në 12 pasagjerë, pa përfshirë ekuipazhin e mjetit lundrues,

me motor me fuqi mbi 30 KW ose 40.8 KF dhe tonazh nën 500 GT, që mbajnë flamurin

shqiptar ose përdorin hapësirën detare shqiptare dhe ujërat e brendshme tokësore.

2. Ky ligj nuk zbatohet për mjetet lundruese në përdorim të Forcave të Armatosura, të

kapitanerisë së porteve, të forcave të policisë, të doganave dhe të organeve të tjera të

parashikuara me ligj.

Neni 3

Përkufizime

1. Për qëllimin e këtij ligji përkufizimet kanë këto kuptime:

a) “Certifikatë regjistrimi” është dokumenti që përfitohet pas regjistrimit të pronësisë për

mjete lundruese mbi 15 ml.