On the Freedom of Establishment and Provision of Services in the Republic of Albania

Lloji: Ligj

Fletore Zyrtare: nr. 102, datë 2026-05-18

LIGJ

Nr. 42/2026

PËR LIRINË E VENDOSJES DHE OFRIMIT TË SHËRBIMEVE

NË REPUBLIKËN E SHQIPËRISË1

Në mbështetje të neneve 78 dhe 83, pika 1, të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi i ligjit

1. Ky ligj përcakton dispozitat e përgjithshme që lehtësojnë ushtrimin e lirisë së vendosjes nga

ofruesit e shërbimeve dhe lirinë e ofrimit të shërbimeve ndërkufitare, duke siguruar një cilësi të lartë

të shërbimeve.

2. Ky ligj nuk rregullon:

a) liberalizimin e shërbimeve me interes të përgjithshëm ekonomik, të rezervuara për subjekte

publike ose private;

b) privatizimin e subjekteve publike që ofrojnë shërbime.

3. Ky ligj nuk rregullon heqjen e monopoleve në ofrimin e shërbimeve dhe as ndihmat e dhëna

nga shteti, të cilat rregullohen nga legjislacioni për ndihmën shtetërore, në përputhje me të drejtën e

Bashkimit Evropian. Ky ligj nuk cenon lirinë e shtetit për të përcaktuar në përputhje me të drejtën e

Bashkimit Evropian se cilat shërbime konsiderohen me interes të përgjithshëm ekonomik, mënyrën

e organizimit dhe të financimit të tyre, si dhe detyrimet specifike që u vendosen këtyre shërbimeve.

4. Ky ligj nuk cenon masat e marra në nivel kombëtar, në përputhje me të drejtën e Bashkimit

Evropian, për mbrojtjen ose promovimin e diversitetit kulturor dhe gjuhësor ose të pluralizmit të

medias.