On the Profession of Real Estate Intermediary

Lloji: Ligj

Fletore Zyrtare: nr. 29, datë 2022-02-22

LIGJ

Nr. 9/2022

PËR PROFESIONIN E NDËRMJETËSIT TË PASURIVE TË PALUAJTSHME

Në mbështetje të neneve 78, 81, pika 1, dhe 83, pika 1, të Kushtetutës, me propozimin e

Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Objekti i këtij ligji është përcaktimi i rregullave për ushtrimin e profesionit të ndërmjetësit të

pasurive të paluajtshme, të drejtat dhe detyrimet e tij, procedurën dhe masat disiplinore ndaj

ndërmjetësit të pasurive të paluajtshme.

Neni 2

Qëllimi

Ky ligj ka për qëllim rregullimin e ushtrimit të profesionit të ndërmjetësit të pasurive të

paluajtshme, mbrojtjen e interesave të ligjshme të ndërmjetësit të pasurive të paluajtshme, si dhe

të çdo shtetasi nëpërmjet garantimit të ligjshmërisë gjatë ndërmjetësimit të veprimeve juridike për

kalimin e pronësisë së sendeve të paluajtshme ose të të drejtave reale mbi to.

Neni 3

Përkufizime

Në këtë ligj termat e mëposhtëm kanë këto kuptime:

1. “Ministri” ose “ministria” është ministri ose ministria përgjegjëse për drejtësinë.

2. “Ndërmjetës i pasurive të paluajtshme” është personi fizik i certifikuar nga ministria

përgjegjëse për drejtësinë për të ndërmjetësuar përfundimin e një marrëveshjeje për realizimin e

veprimit juridik të kalimit të pronësisë së pasurive të paluajtshme ose të të drejtave reale mbi to.