On Municipal Police

Lloji: Ligj

Fletore Zyrtare: nr. 6, datë 2023-01-16

LIGJ

Nr. 89/2022

PËR POLICINË BASHKIAKE

Në mbështetje të neneve 78, 81, pika 1, dhe 83, pika 1, të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Ky ligj rregullon misionin, organizimin, funksionimin dhe kompetencat e Policisë Bashkiake në

Republikën e Shqipërisë, marrëdhëniet e punës së punonjësit të Policisë Bashkiake, si dhe masat për

ruajtjen e rendit e të sigurisë publike në komunitet.

Neni 2

Misioni

Policia Bashkiake ka si mision ushtrimin e funksioneve në shërbim të sigurisë, qetësisë dhe rendit në

komunitet, mbarëvajtjes së punëve publike, miradministrimit të hapësirave publike dhe mbrojtjes së

mjedisit në territorin e juridiksionit të saj.

Neni 3

Përkufizime

Në kuptim të këtij ligji termat e mëposhtëm kanë këto kuptime:

1. “Drejtuesi i Policisë Bashkiake” është autoriteti më i lartë ekzekutiv dhe organizativ i Policisë

Bashkiake, që përgjigjet drejtpërdrejt para kryetarit të bashkisë për realizimin e detyrave dhe objektivave

të përcaktuar.

2. “Emërim i punonjësit të Policisë Bashkiake” është momenti i fillimit të marrëdhënieve juridike të

punës për punonjësin e Policisë Bashkiake.

3. “Hapësirat publike” janë hapësirat e jashtme, si: trotuari, rruga, sheshi, lulishtja, parku e të tjera të

ngjashme në shërbim të komunitetit, ku menaxhimi është publik ose privat, si edhe rrugëkalimet