On Competences Concerning the Determination of Salaries, Other Financial Benefits and Allowances of Employees in Public Administration Institutions, as well as the Minimum Base Salary at National Level

Lloji: Ligj

Fletore Zyrtare: nr. 82, datë 2023-05-30

LIGJ

Nr. 35/2023

PËR KOMPETENCAT PËR CAKTIMIN E PAGAVE, TRAJTIMEVE TË TJERA

FINANCIARE DHE PËRFITIMEVE TË TË PUNËSUARVE NË INSTITUCIONET

E ADMINISTRATËS PUBLIKE, SI DHE TË PAGËS BAZË MINIMALE

NË SHKALLË VENDI

Në mbështetje të neneve 78 dhe 83, pika 1, të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi i ligjit

Ky ligj ka si qëllim krijimin e kuadrit rregullator për kompetencat për caktimin e pagave, të

trajtimeve të tjera financiare dhe të përfitimeve të të punësuarve në institucionet e administratës

publike, si dhe për përcaktimin e pagës bazë minimale në shkallë vendi.

Neni 2

Objekti i ligjit

Ky ligj përcakton institucionet dhe organet që kanë të drejtë të propozojnë dhe të miratojnë:

a) paga, trajtime të tjera financiare dhe përfitime për të punësuarit e institucioneve të administratës

publike;

b) pagën bazë minimale në shkallë vendi, të detyrueshme për t’u zbatuar nga çdo punëdhënës në

Republikën e Shqipërisë.

Neni 3

Përkufizime

Në kuptim të këtij ligji, termat e mëposhtëm kanë këto kuptime:

1. “Institucione të administratës publike” janë institucionet e administratës shtetërore, institucionet

e pavarura, njësitë e vetëqeverisjes vendore, njësitë e fondeve speciale dhe ndërmarrjet shtetërore me

kapital mbi 50 për qind shtetëror.