ON PRIVATIZATION PROCEDURES FOR DWELLINGS CONSTRUCTED OR PURCHASED WITH STATE FUNDS BY THE NATIONAL HOUSING ENTITY

Lloji: Ligj

Fletore Zyrtare: nr. 45, datë 2005-06-14

LIGJ

Nr.9416, datë 20.5.2005

PËR PROCEDURAT E PRIVATIZIMIT TË BANESAVE TË NDËRTUARA OSE TË BLERA ME FONDE SHTETËRORE NGA ENTI KOMBËTAR I BANESAVE

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Qëllimi

Ky ligj ka qëllim të përcaktojë procedurat dhe format e privatizimit të banesave të ndërtuara ose të blera me fonde të Buxhetit të Shtetit nga Enti Kombëtar i Banesave (më poshtë EKB) deri në vitin 2005.

Neni 2

Përkufizime

Në këtë ligj, termat e përdorur kanë këto kuptime:

1. “Privatizim” është procesi i kalimit të pronësisë nga Enti Kombëtar i Banesave te familja, sipas procedurave dhe formës së parashikuar në këtë ligj.

2. “Shumë falas është shuma në të holla, që përfiton, si kontribut i shtetit, familja e pastrehë, sipas specifikimeve në këtë ligj.

3. “Familje që kanë zënë banesat e ndërtuara nga EKB-ja” janë familjet, që nuk janë miratuar me vendim të këshillit të bashkisë ose të komunës, për t’u strehuar në banesat e ndërtuara nga EKB-ja.

4. “Familje të pastreha” janë familjet, të cilat nuk kanë përfituar nga ligji nr.7652, datë 23.12.1992 “Për privatizmin e banesave shtetërore” dhe janë miratuar me vendim të këshillit të bashkisë ose të komunës deri më 30 maj 1998.