ON THE STATE POLICE

Lloji: Ligj

Fletore Zyrtare: nr. 33, datë 1999-12-16

LIGJ

Nr.8553, datë 25.11.1999

PËR POLICINË E SHTETIT

Në mbështetje të neneve 78 dhe 83 pika 1 të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOS I:

KREU I

DISPOZITA TË PËRGJITHSHME

Neni 1

Kuptimi

1. Policia e shtetit, në vijim e shprehur “Policia”, është institucion i administratës

shtetërore të Republikës së Shqipërisë, në varësi të Ministrit të Rendit Publik, që ka për mision të

mbrojë rendin dhe sigurinë publike, si dhe të garantojë zbatimin e ligjit.

2. Veprimtaria e Policisë bazohet në Kushtetutë, në aktet normative në zbatim të saj, si

dhe në aktet ndërkombëtare të pranuara në përputhje me të.

3. Policia ka organizim unik e të centralizuar, me shtrirje në të gjithë territorin e

Shqipërisë, si dhe është e depolitizuar. Ajo është person juridik, buxheti i së cilës është zë më vete

në buxhetin e Ministrisë së Rendit Publik.

4. Policia e realizon misionin e vet duke qenë e pranishme në publik ose edhe forcërisht,

në përputhje me statusin e përcaktuar në këtë ligj.

5. Veprimtaria e Policisë është e hapur për publikun, përveç rasteve të parashikuara në

ligj.

Neni 2

Pandryshueshmëria e statusit

1. Statusi i Policisë, i përcaktuar në këtë ligj, nuk ndryshon edhe në kushtet e gjendjes së

luftës, të gjendjes së jashtëzakonshme apo të rasteve të fatkeqësive natyrore.