ELECTORAL CODE OF THE REPUBLIC OF ALBANIA

Lloji: Ligj

Fletore Zyrtare: nr. 12, datë 2000-05-13

LIGJ

Nr.8609, datë 8.5.2000

KODI ZGJEDHOR I REPUBLIKËS SË SHQIPËRISË

Në mbështetje të neneve 81 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

PJESA E PARË

PËRKUFIZIME DHE PARIME

Neni 1

Qëllimi i këtij Kodi

Ky Kod ka për qëllim përcaktimin e rregullave:

a) për votimin për zgjedhjet për Kuvendin, për organet e qeverisjes vendore dhe në referendum;

b) për organizimin dhe funksionimin e komisioneve të zgjedhjeve;

c) për përgatitjen dhe rishikimin e listave të zgjedhësve;

ç) për caktimin e zonave zgjedhore;

d) për regjistrimin e subjekteve zgjedhore dhe financimin e tyre;

dh) për pasqyrimin e fushatave zgjedhore nga ana e mediave;

e) për zhvillimin dhe vlefshmërinë e referendumeve;

ë) për procedurat e votimit dhe të nxjerrjes së rezultateve të zgjedhjeve;

f) për shkeljet penale dhe administrative të dispozitave të këtij Kodi.

Neni 2

Përkufizime

Për qëllimet e këtij Kodi:

1. “Data e zgjedhjeve” është data e votimit, e caktuar me dekret të Presidentit të Republikës dhe nuk përfshin datën kur mund të zhvillohet një raund i dytë votimi.

2. “Institucione të posaçme” janë burgjet, vendet e paraburgimit, spitalet ose institucionet e tjera shëndetësore, që pranojnë pacientë për më shumë se tri ditë.