On the Control of Substances Used for the Illegal Manufacture of Narcotic and Psychotropic Substances

Lloji: Ligj

Fletore Zyrtare: nr. 12, datë 2002-04-29

LIGJ

Nr. 8874, datë 29.3.2002

PËR KONTROLLIN E LËNDËVE QË PËRDOREN PËR FABRIKIMIN E PALIGJSHËM TË LËNDËVE NARKOTIKE DHE PSIKOTROPE

Në mbështetje të neneve 78, 81 pika 1 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti dhe qëllimi

Ky ligj ka për qëllim kontrollin e lëndëve që shpesh përdoren për fabrikimin e paligjshëm të lëndëve narkotike dhe psikotrope, duke synuar parandalimin e shmangien nga destinacioni të lëndëve të tilla dhe në vendosjen e sanksioneve ndaj shkeljeve, që përcaktohen në këtë ligj.

Neni 2

Përkufizime

Sipas këtij ligji, do të kenë kuptimin e mëposhtëm:

a) “Lëndë e listuar” është çdo lëndë e renditur në shtojcën 1 të këtij ligji, duke përfshirë produkte natyrore dhe përzierje që përmbajnë lëndë të tilla. Kjo përjashton barnat ose përgatesat e tjera që përmbajnë lëndë të listuara, të cilat janë përzier në mënyrë të tillë që nuk mund të përdoren ose të ripërftohen lehtë.

b) “Import” është çdo futje fizike e lëndëve të listuara sipas këtij ligji, në përputhje me legjislacionin doganor të Republikës së Shqipërisë.

c) “Eksport” është çdo nisje fizike e lëndëve të listuara, sipas këtij ligji, në përputhje me legjislacionin doganor të Republikës së Shqipërisë.

ç) “Tranzit” është çdo transportim lëndësh të listuara ndërmjet vendeve të tjera, nëpërmjet territorit të Republikës së Shqipërisë.