On the Security of Deposits

Lloji: Ligj

Fletore Zyrtare: nr. 11, datë 2002-04-18

LIGJ

Nr. 8873, datë 29.3.2002

PËR SIGURIMIN E DEPOZITAVE

Në mbështetje të neneve 78, 81 pika 1 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Qëllimi

Ky ligj ka për qëllim të rregullojë sigurimin dhe kompensimin e depozitave, si dhe krijimin, përgjegjësitë dhe veprimtarinë e Agjencisë së Sigurimit të Depozitave.

Neni 2

Përcaktime

Për qëllimin e këtij ligji, përveçse kur përcaktohet ndryshe në këtë ligj, termat e mëposhtëm kanë kuptimin:

a) “Agjencia” është Agjencia e Sigurimit të Depozitave, e krijuar sipas dispozitave të këtij ligji;

b) “Autoriteti Mbikëqyrës” është Banka e Shqipërisë;

c) “Akt nënligjor” është akti i Autoritetit Mbikëqyrës i dalë në bazë dhe për zbatim të këtij ligji;

ç) “Bankë" është personi juridik që pranon dhe grumbullon depozita ose fonde të tjera të ripagueshme për publikun dhe jep kredi, paradhënie, hua ose investon për llogari të tij, sipas licencës së dhënë nga Autoriteti Mbikëqyrës;

d) “Bankë e siguruar” është banka që pranon depozita të siguruara nga Agjencia dhe dega në Shqipëri e bankës së huaj që pranon depozita të siguruara nga Agjencia;

dh) “Degë e bankës" është njësia organizative e bankës nën varësinë e drejtorisë qendrore të saj, që kryen drejtpërsëdrejti të gjitha ose disa veprimtari të bankës;