Për funksionimin e Institutit Gjeografik Ushtarak të Shqipërisë

Lloji: Ligj

Fletore Zyrtare: nr. 32, datë 2002-07-04

L I G J

Nr. 8907, datë 6.6.2002

PËR FUNKSIONIMIN E INSTITUTIT GJEOGRAFIK USHTARAK TË SHQIPËRISË

Në mbështetje të neneve 78, 81 pika 1 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Objekti dhe misioni

Objekt i këtij ligji është përcaktimi i detyrave, i pozicionit shkencor dhe prodhues të Institutit Gjeografik Ushtarak të Shqipërisë, si institucion shtetëror dhe agjenci hartografike kombëtare për gjeodezinë dhe hartografinë shqiptare.

Instituti ka si mision mbështetjen gjeografike të veprimeve ushtarake të Forcave të Armatosura.

Neni 2

Përkufizimet

Në kuptim të këtij ligji:

1. “Gjeodezi” nënkupton shkencën që studion trajtën e tokës dhe përmasat e saj.

2. “Hartografi” nënkupton shkencën që merret me hartimin e hartave.

3. “Gjeografik” ka të bëjë me gjeografinë dhe dukuritë që janë objekt i saj.

4. “Rrjeti gjeodezik” nënkupton tërësinë e pikave të përcaktuara me koordinata në sipërfaqen e tokës në një sistem koordinativ të caktuar. Këtu përfshihen rrjeti i pikave të kontrollit horizontal dhe rrjeti i nivelimit.

5. “Përgatitja gjeografike” nënkupton grumbullimin e të dhënave për elementet e mjedisit biofizik dhe social, me dukuritë e tyre në hapësirë.

6. “Astronomi” nënkupton shkencën që merret me studimin e trupave qiellorë dhe me ligjet e lëvizjes së tyre.