PËR GJENDJEN CIVILE

Lloji: Ligj

Fletore Zyrtare: nr. 71, datë 2002-11-13

LIGJ

Nr. 8950, datë 10.10.2002

PËR GJENDJEN CIVILE

Në mbështetje të neneve 78, 81 pika 1 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Objekti i këtij ligji është kuptimi dhe përbërësit e gjendjes civile të shtetasve shqiptarë dhe personave pa shtetësi, si dhe organizimi e funksionimi i shërbimit të gjendjes civile në Republikën e Shqipërisë.

Neni 2

Përkufizime

Në kuptim të këtij ligji:

1. “Regjistër Kombëtar i Gjendjes Civile” është dokumenti shtetëror ku pasqyrohen përbërësit e gjendjes civile për çdo shtetas.

2. “Regjistri themeltar” është libri me fletë të hapur për çdo familje, ku pasqyrohen, për secilin person, të gjithë përbërësit e gjendjes civile.

3. “Përbërës të gjendjes civile” janë të gjitha elementet e përcaktuara në këtë ligj, që shërbejnë për plotësimin e të dhënave, për qartësimin dhe saktësimin e identitetit të çdo shtetasi.

4. “Përbërës të prezumuar” janë përbërësit e gjendjes civile, që vlerësohen të mirëqenë deri në çastin që vërtetohet ndryshe.

5. “Plotësime me akte” është procesi i plotësimit të të dhënave, të cilat mungojnë në akte.

6. “I ngarkuari i posaçëm i pushtetit vendor” është kryetari i bashkisë ose i komunës ose personi i autorizuar me shkrim prej tij.

Neni 3

Kuptimi i gjendjes civile