Për krijimin e kushteve lehtësuese për ndërtimin e burimeve të reja të prodhimit të energjisë elektrike

Lloji: Ligj

Fletore Zyrtare: nr. 90, datë 2002-12-31

LIGJ

Nr. 8987, datë 24.12.2002

PËR KRIJIMIN E KUSHTEVE LEHTËSUESE PËR NDËRTIMIN E BURIMEVE TË REJA TË PRODHIMIT TË ENERGJISË ELEKTRIKE

Në mbështetje të neneve 78 pika 1, 81 pika 1, 83 pika 1 dhe 155 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Qëllimi i këtij ligji është krijimi i kushteve lehtësuese, deri në liberalizimin e plotë të çmimit të energjisë elektrike, për çdo person juridik vendas dhe të huaj, që do të ndërtojë burime të prodhimit të energjisë elektrike.

Neni 2

Çdo person juridik vendas dhe i huaj, që do të ndërtojë burime të prodhimit të energjisë elektrike me fuqi të instaluar jo më pak se 5 MW për burim, që përdorin lëndë djegëse të lëngëta ose të ngurta dhe pa kufizim për burimet e tjera të rinovueshme të prodhimit, përjashtohet nga taksat doganore për makineritë dhe pajisjet, që bëjnë pjesë në objektin e prodhimit të energjisë elektrike.

Neni 3

Çdo personi juridik vendas dhe i huaj, që ndërton burime të prodhimit të energjisë elektrike, sipas përcaktimeve të nenit 2 të këtij ligji, i rimbursohet kundërvlefta e paguar për taksat doganore dhe akcizat e lëndëve djegëse të lëngëta ose të ngurta të përdorura për sasinë e energjisë së shitur, duke marrë në konsideratë konsumin specifik të teknologjisë së zbatuar.