PËR VLERËSIMIN E NDIKIMIT NË MJEDIS

Lloji: Ligj

Fletore Zyrtare: nr. 5, datë 2003-02-19

LIGJ

Nr. 8990, datë 23.1.2003

PËR VLERËSIMIN E NDIKIMIT NË MJEDIS

Në mbështetje të neneve 78, 81 pika 1 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Ky ligj synon të sigurojë:

a) vlerësimin e përgjithshëm, të integruar dhe në kohë të ndikimeve mjedisore, të projekteve ose veprimtarive që kërkojnë të zbatohen, duke parandaluar dhe zbutur ndikimet negative në mjedis;

b) një proces vlerësimi të hapur dhe të administruar me paanshmëri, nëpërmjet pjesëmarrjes së organeve qendrore e vendore, të publikut, të organizatave jofitimprurëse për mjedisin, të propozuesit të projektit dhe të personave fizikë dhe juridikë, të specializuar në këtë fushë.

Neni 2

Objekti

Ky ligj përcakton rregullat, procedurat, afatet, të drejtat dhe detyrat:

a) për të identifikuar, saktësuar dhe vlerësuar ndikimet e drejtpërdrejta dhe të tërthorta të projektit ose veprimtarisë në mjedisin ku do të zbatohen;

b) për të krahasuar përparësitë dhe mangësitë e një projekti, të propozuar në variante të tjera, të mundshme, që përmbajnë ndryshime:

në vendin ku do të zbatohet projekti;

në përmasat dhe kapacitetet e tij;

në teknologji;

në krahasimet me gjendjen e mjedisit, nëse nuk do të zbatohej projekti;

në përcaktimin e masave për të parandaluar dhe zbutur dëmtimet në mjedis;