PËR INTEGRIMIN DHE BASHKIMIN FAMILJAR TË PERSONAVE QË KANË PËRFITUAR AZIL NË REPUBLIKËN E SHQIPËRISË

Lloji: Ligj

Fletore Zyrtare: nr. 64, datë 2003-08-04

LIGJ

Nr.9098, datë 3.7.2003

PËR INTEGRIMIN DHE BASHKIMIN FAMILJAR TË PERSONAVE QË KANË PËRFITUAR AZIL NË REPUBLIKËN E SHQIPËRISË

Në mbështetje të neneve 40, 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti i ligjit

Ky ligj rregullon procedurat për realizimin e të drejtave për arsimimin, punësimin, kujdesin shëndetësor e shoqëror, strehimin dhe bashkimin familjar të personave, që kanë përfituar azil në Republikën e Shqipërisë.

Neni 2

Subjektet përfituese të ligjit

1. I huaji, që ka përfituar azil në Republikën e Shqipërisë, në mbështetje të ligjit nr. 8432, datë 14.12.1998 “Për azilin në Republikën e Shqipërisë”, është subjekt i dispozitave të përcaktuara në këtë ligj, përveç rasteve të kufizimeve të parashikuara me ligj.

2. Dispozitat e këtij ligji zbatohen dhe për azilkërkuesit për aq sa nuk bien në kundërshtim me kufizimet e përcaktuara nga legjislacioni në fuqi.

Neni 3

Zbatimi i ligjit për të huajt në mbrojtje të përkohshme, në raste fluksesh masive

1. Për të huajin në mbrojtje të përkohshme, në raste fluksesh masive, dispozitat e këtij ligji zbatohen për aq sa nuk bien në kundërshtim me parashikime të tjera ligjore, nëpërmjet nxjerrjes së vendimeve përkatëse nga Komisioni Kombëtar për Refugjatët.