PËR DISA SHTESA DHE NDRYSHIME NË LIGJIN NR. 7829, DATË 1.6.1994 “PËR NOTERINË”, NDRYSHUAR ME LIGJIN NR. 8790, DATË 10.5.2001

Lloji: Ligj

Fletore Zyrtare: nr. 28, datë 2004-05-13

LIGJ

Nr.9216, datë 1.4.2004

PËR DISA SHTESA DHE NDRYSHIME NË LIGJIN NR. 7829, DATË 1.6.1994 “PËR NOTERINË”, NDRYSHUAR ME LIGJIN NR. 8790, DATË 10.5.2001

Në mbështetje të neneve 78 pika 1 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Në ligjin nr. 7829, datë 1.6.1994 “Për noterinë”, ndryshuar me ligjin nr. 8790, datë 10.5.2001, bëhen këto shtesa dhe ndryshime:

Neni 1

Neni 2 ndryshohet si më poshtë:

“Neni 2

1.Profesionin e noterit mund ta ushtrojë çdo shtetas i Republikës së Shqipërisë, i cili plotëson këto kushte:

a) ka kryer arsimin e lartë juridik;

b) ka zotësi të plotë për të vepruar;

c) është jo më pak se 26 vjeç dhe jo më shumë se 55 vjeç në çastin e dhënies së provimit të kualifikimit për marrjen e lejes së ushtrimit të profesionit të noterit;

ç) nuk është dënuar me vendim gjyqësor të formës së prerë për një vepër penale të kryer me dashje;

d) nuk është larguar nga detyra apo funksioni i gjyqtarit, i prokurorit ose i nëpunësit të administratës publike për shkelje të rregullave dhe të disiplinës në punë gjatë 3 vjetëve të fundit nga data e paraqitjes së kërkesës për lejimin e ushtrimit të profesionit të noterit;

dh) ka punuar jo më pak se 2 vjet asistent pranë një noteri;