PËR PRODUKTET E NDËRTIMIT

Lloji: Ligj

Fletore Zyrtare: nr. 81, datë 2004-11-12

LIGJ

Nr.9290, datë 7.10.2004

PËR PRODUKTET E NDËRTIMIT

Në mbështetje të neneve 78 dhe 83 pika 1 të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Ky ligj përcakton kushtet e përdorimit të produkteve të ndërtimit, pranimin e miratimeve

teknike për këto produkte, vlerësimin dhe vërtetimin e konformitetit me kërkesat themelore, si dhe

rregullon hedhjen në treg të produkteve të ndërtimit, kryerjen e mbikëqyrjes së tregut dhe zbatimin e

procedurave të veçanta për njohjen e tyre.

Neni 2

Fusha e zbatimit

Ky ligj zbatohet për ato produkte ndërtimi që plotësojnë kërkesat themelore, të përcaktuara në

nenin 4 të këtij ligji, dhe nuk zbatohet për produktet që nuk plotësojnë specifikimet teknike që u

referohen neneve 5, 6 e 7 të këtij ligji.

KREU II

PËRKUFIZIMET DHE KËRKESAT THEMELORE TË PRODUKTIT TË NDËRTIMIT

Neni 3

Përkufizime

Në kuptim të këtij ligji, termat e mëposhtëm nënkuptojnë:

1. "Produkt ndërtimi” është çdo produkt, i prodhuar për t’u përdorur, në mënyrë të

përhershme, në punimet e ndërtimit.

2. "Punime ndërtimi" janë punimet e ndërtimit në ndërtesa, në objekte publike, në vepra

industriale, të infrastrukturës dhe në objekte të tjera.

3. "Hedhja në treg" është një produkt ndërtimi i përshtatshëm për përdorim në Republikën e

Shqipërisë.