PËR QIRANË FINANCIARE

Lloji: Ligj

Fletore Zyrtare: nr. 48, datë 2005-06-15

LIGJ

Nr.9396, datë 12.5.2005

PËR QIRANË FINANCIARE

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Përkufizime

Në këtë ligj termat e mëposhtëm kanë këtë kuptim:

1. “Afat i qirasë” është afati fillestar i përcaktuar në kontratën e qirasë financiare, gjatë së cilës qiramarrësi ka të drejtë të mbajë dhe të përdorë sendin.

2. “Çmim blerjeje” është shuma e paracaktuar, që qiramarrësi paguan pas mbarimit të afatit të kontratës së qirasë, kur vendos ta blejë sendin.

3. “Defekte të sendit” janë të metat fizike, të shfaqura ose të fshehura, të sendit.

4. “Defekte ligjore” janë pengesat e krijuara, që pengojnë ose cenojnë gëzimin e qetë e të plotë të sendit nga qiramarrësi gjatë tërë afatit të qirasë financiare.

5. “Dorëzanës” ka kuptimin që i jepet në Kodin Civil të Republikës së Shqipërisë.

6. “Furnizues” është personi fizik ose juridik që, në bazë të kontratës së furnizimit, i shet qiradhënësit sendin që i jepet me qira qiramarrësit.

7. “Këste pagese” janë pagesat e çmimit të shitjes, që paguhen nga blerësi në rastin e shitjes me rezervë të sendit.