Për aderimin e Republikës së Shqipërisë në Konventën për Kontratën e Transportit Rrugor Ndërkombëtar të Mallrave (CMR) dhe Protokollin e nënshkrimit

Lloji: Ligj

Fletore Zyrtare: nr. 39, datë 2006-05-03

LIGJ

Nr.9503, datë 3.4.2006

PËR ADERIMIN E REPUBLIKËS SË SHQIPËRISË NË KONVENTËN PËR KONTRATËN E TRANSPORTIT RRUGOR NDËRKOMBËTAR TË MALLRAVE (CMR) DHE PROTOKOLLIN E NËNSHKRIMIT

Në mbështetje të neneve 78, 83 pika 1 dhe 121 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Republika e Shqipërisë aderon në Konventën për Kontratën e Transportit Rrugor Ndërkombëtar të Mallrave (CMR) dhe Protokollin e nënshkrimit.

Neni 2

Ky ligj hyn në fuqi 15 ditë pas botimit në Fletoren Zyrtare.

Shpallur me dekretin nr.4837, datë 25.4.2006 të Presidentit të Republikës së Shqipërisë, Alfred Moisiu

KONVENTA

MBI KONTRATËN PËR TRANSPORTIN RRUGOR NDËRKOMBËTAR TË MALLRAVE (CMR)

Bërë në Gjenevë, më 19 Maj 1956

Kombet e Bashkuara

PREAMBULË

Palët kontraktuese,

duke njohur dobinë e standardizimit të kushteve që rregullojnë kontratën për transportin rrugor ndërkombëtare të mallrave, sidomos në lidhje me dokumentet për këtë transport dhe përgjegjësinë e transportuesit,

ranë dakord si më poshtë:

KAPITULLI I

FUSHA E ZBATIMIT

Neni 1

1. Kjo Konventë zbatohet për çdo kontratë të transportit rrugor të mallrave në automjete me shpërblim, ku vendi i marrjes në dorëzim të mallrave dhe vendi i caktuar për dorëzim, sipas parashikimit në kontratë, ndodhen në dy vende të ndryshme, nga të cilët njëri është vend kontraktues, pavarësisht nga vendbanimi ose shtetësia e palëve.