Për aderimin e Republikës së Shqipërisë në Konventën e UNESCO-s “Për mbrojtjen dhe zhvillimin e larmisë së shprehjeve të kulturave”

Lloji: Ligj

Fletore Zyrtare: nr. 110, datë 2006-10-16

LIGJ

Nr.9613, datë 21.9.2006

PËR ADERIMIN E REPUBLIKËS SË SHQIPËRISË NË KONVENTËN E UNESCO-S “PËR MBROJTJEN DHE ZHVILLIMIN E LARMISË SË SHPREHJEVE TË KULTURAVE”

Në mbështetje të neneve 78, 83 pika 1 dhe 121 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Republika e Shqipërisë aderon në Konventën e UNESCO-s “Për mbrojtjen dhe zhvillimin e larmisë së shprehjeve të kulturave”.

Neni 2

Ky ligj hyn në fuqi 15 ditë pas botimit në Fletoren Zyrtare.

Shpallur me dekretin nr.5062, datë 4.10.2006 të Presidentit të Republikës së Shqipërisë, Alfred Moisiu

KONVENTA

PËR MBROJTJEN DHE ZHVILLIMIN E LARMISË SË SHPREHJEVE KULTURORE

Paris, 20 tetor 2005

Konferenca e Përgjithshme e Organizatës Edukative, Shkencore dhe Kulturore të Kombeve të Bashkuara, mbledhur në Paris nga data 3 deri në 21 tetor 2005 në sesionin e saj të 33-të:

duke pohuar që larmia kulturore është një karakteristikë përcaktuese e njerëzimit;

e ndërgjegjshme që larmia kulturore krijon një trashëgimi të përbashkët të njerëzimit dhe që duhet të zhvillohet dhe ruhet për të mirën e të gjithëve;

me vetëdije që larmia kulturore krijon një botë të pasur dhe të larmishme, e cila rrit gamën e zgjedhjeve dhe ushqen kapacitetet dhe vlerat e njeriut dhe për rrjedhojë është një forcë shtytëse për zhvillimin e qëndrueshëm për komunitetet, popujt dhe kombet;