PËR MASAT MBROJTËSE NË IMPORTE

Lloji: Ligj

Fletore Zyrtare: nr. 103, datë 2007-08-06

LIGJ

Nr.9790, datë 19.7.2007

PËR MASAT MBROJTËSE NË IMPORTE

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Ky ligj parashikon parimet dhe procedurat për marrjen e masave mbrojtëse, kur një produkt importohet në sasi të mëdha, duke shkaktuar dëm ose kërcënuar për dëm serioz prodhuesin vendas të produkteve të ngjashme ose të produkteve konkurruese, në mënyrë të drejtpërdrejtë, si dhe parimet e procedurat për rregullimin e këtij dëmi apo kërcënimi për dëm, me kusht që këto masa të jenë të përkohshme dhe të kufizuara, në përputhje me shkallën e dëmit apo të kërcënimit për dëm dhe me detyrimet ndërkombëtare e interesat e vendit tonë.

Neni 2

Përkufizime

Në këtë ligj termat e mëposhtëm kanë këto kuptime:

a) “Dëmi” është dëmi pasuror ose kërcënimi për dëm, që i shkaktohet industrisë së vendit, apo pengimi i krijimit të industrisë së vendit;

b) “Ministria” është ministria, që mbulon fushën e tregtisë;

c) “Hetim” është shqyrtimi për të përcaktuar ekzistencën, shkallën dhe efektin e importeve të produktit në sasi të mëdha dhe në kushte të tilla, duke shkaktuar dëm ose kërcënuar për dëm serioz prodhuesin vendas të produkteve të ngjashme ose të produkteve konkurruese, në mënyrë të drejtpërdrejtë;