PËR ADERIMIN E REPUBLIKËS SË SHQIPËRISË NË KONVENTËN E KOMBEVE TË BASHKUARA “PËR ARRESTIMIN E ANIJEVE, 1999”

Lloji: Ligj

Fletore Zyrtare: nr. 201, datë 2008-12-31

LIGJ

Nr.10 035, datë 22.12.2008

PËR ADERIMIN E REPUBLIKËS SË SHQIPËRISË NË KONVENTËN E KOMBEVE TË BASHKUARA “PËR ARRESTIMIN E ANIJEVE, 1999”

Në mbështetje të neneve 78, 83 pika 1 dhe 121 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Republika e Shqipërisë aderon në konventën e Kombeve të Bashkuara “Për arrestimin e anijeve, 1999”.

Neni 2

Ky ligj hyn në fuqi 15 ditë pas botimit në Fletoren Zyrtare.

Shpallur me dekretin nr.5993, datë 12.1.2009 të Presidentit të Republikës së Shqipërisë, Bamir Topi

KONVENTA

NDËRKOMBËTARE PËR ARRESTIMIN E ANIJEVE 1999

KOMBET E BASHKUARA

1999

Shtetet Palë në këtë Konventë,

duke njohur dëshirën për lehtësimin e zhvillimit harmonik dhe të rregullt të tregtisë detare botërore;

të bindur për domosdoshmërinë e një instrumenti ligjor që përcakton uniformitetin ndërkombëtar në fushën e arrestimit të anijeve, i cili merr parasysh zhvillimet e fundit në fushat që lidhen me të,

kanë rënë dakord si më poshtë:

Neni 1

Përkufizimet

Për qëllimet e kësaj Konvente:

1. "Pretendim detar" do të thotë një pretendim që lind prej njërës ose disave nga pikat e mëposhtme:

a) humbjen ose dëmtimin e shkaktuar nga përdorimi i anijes;

b) humbjen e jetës ose plagosjen personale që ndodh si në tokë edhe në ujë, në lidhje të drejtpërdrejtë me operimin e anijes;