PËR RATIFIKIMIN E “MARRËVESHJES SË THEMELIMIT TË KORPORATËS ISLAMIKE PËR ZHVILLIMIN E SEKTORIT PRIVAT”

Lloji: Ligj

Fletore Zyrtare: nr. 46, datë 2009-04-23

LIGJ

Nr.10 105, datë 30.3.2009

PËR RATIFIKIMIN E “MARRËVESHJES SË THEMELIMIT TË KORPORATËS ISLAMIKE PËR ZHVILLIMIN E SEKTORIT PRIVAT”

Në mbështetje të neneve 78, 83 pika 1 dhe 121 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Ratifikohet “Marrëveshja për themelimin e Korporatës Islamike për Zhvillimin e Sektorit Privat”.

Neni 2

Ky ligj hyn në fuqi 15 ditë pas botimit në Fletoren Zyrtare.

Shpallur me dekretin nr.6127, datë 8.4.2009 të Presidentit të Republikës së Shqipërisë,

Bamir Topi

MARRËVESHJE THEMELUESE

KORPORATA ISLAMIKE PËR ZHVILLIMIN E SEKTORIT PRIVAT

Qeveritë dhe institucionet në emër të të cilave nënshkruhet kjo marrëveshje

duke pranuar që qëllimi i Bankës Islamike për Zhvillim është nxitja e zhvillimit ekonomik dhe e përparimit social me anë të inkurajimit të zgjerimit si të ndërmarrjeve produktive shtetërore, dhe ato private në vendet anëtare të Bankës Islamike për Zhvillim, në pajtim me parimet e Shari’ah-ut;

duke marrë në konsideratë prirjen në këto vende anëtare të transferimit të financimit të projekteve të zhvillimit nga sektori publik në atë privat, që çojnë në lindjen e mundësive të reja që sektori privat të kontribuojë në zhvillimin ekonomik të vendeve anëtare;

duke kuptuar nevojën për nxitjen e zgjerimit të ndërmarrjeve private produktive në vendet anëtare;