Për nënproduktet me origjinë shtazore

Lloji: Ligj

Fletore Zyrtare: nr. 135, datë 2026-06-26

LIGJ

Nr. 56/2026

PËR NËNPRODUKTET ME ORIGJINË SHTAZORE1

Në mbështetje të neneve 78 dhe 83, pika 1, të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti dhe qëllimi

1. Objekti i këtij ligji është përcaktimi i rregullave të shëndetit publik e të shëndetit të kafshëve

për nënproduktet me origjinë shtazore dhe për produktet derivate.

2. Qëllimi i këtij ligji është parandalimi dhe minimizimi i risqeve për shëndetin publik e për

shëndetin e kafshëve, që rrjedhin nga këto produkte, dhe në veçanti për të mbrojtur sigurinë e zinxhirit

ushqimor dhe të ushqimeve për kafshë.

Neni 2

Fusha e zbatimit

1. Ky ligj zbatohet për:

a) nënproduktet me origjinë shtazore dhe produktet derivate, të cilat janë përjashtuar nga konsumi

për njerëzit sipas rregullave të këtij ligji;

b) produktet të cilat pas vendimit përfundimtar të marrë nga operatori i biznesit ushqimor nuk

përdoren më si ushqim për njerëz, ku përfshihen:

i. produkte me origjinë shtazore, që ishin të destinuara për konsum nga njerëzit, sipas kërkesave

të legjislacionit për ushqimin;

ii. lëndë të para për prodhimin e produkteve me origjinë shtazore.

2. Ky ligj nuk zbatohet për nënproduktet me origjinë shtazore, si më poshtë:

a) kadavra të plota ose pjesë të kafshëve të egra, të ndryshme nga kafshët e gjuetisë, të cilat nuk