PËR MARRËDHËNIET JURIDIKSIONALE NË ÇËSHTJET PENALE ME TASK FORCËN HETIMORE SPECIALE TË EULEX-IT

Lloji: Ligj

Fletore Zyrtare: nr. 51, datë 2012-05-11

LIGJ

Nr. 53/2012

PËR MARRËDHËNIET JURIDIKSIONALE NË ÇËSHTJET PENALE

ME TASK FORCËN HETIMORE SPECIALE TË EULEX-IT

Në mbështetje të neneve 83 pikat 1 dhe 2, 84 pika 4 dhe 122 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

1. Objekti i këtij ligji është përcaktimi i rregullave procedurale për marrëdhëniet juridiksionale në çështjet penale me Task Forcën Hetimore Speciale të EULEX-it. Autoritetet kompetente të Republikës së Shqipërisë i ofrojnë Task Forcës Hetimore Speciale të EULEX-it bashkëpunimin e tyre gjyqësor të plotë dhe të gjithanshëm.

2. Dispozitat e këtij ligji zbatohen vetëm në masën dhe për kohëzgjatjen e operacioneve të Task Forcës Hetimore Speciale të EULEX-it, deri në përfundimin e veprimtarisë së saj, sipas përcaktimit në aktet ligjore që rregullojnë funksionimin e kësaj Task Force.

3. Dispozitat e këtij ligji nuk zbatohen në procedimet e tjera që lidhen me vepra penale, të filluara prej ose që i drejtohen ndonjë autoriteti gjyqësor kosovar, duke përfshirë edhe gjyqtarët dhe prokurorët e EULEX-it, me përjashtim të Task Forcës Hetimore Speciale të EULEX-it dhe procedimeve penale të filluara ose të kryera prej saj.

Neni 2

Përkufizime

Në këtë ligj termat e mposhtëm kanë këto kuptime: