PËR QENDRËN E BOTIMEVE ZYRTARE

Lloji: Ligj

Fletore Zyrtare: nr. 140, datë 2012-10-31

LIGJ

Nr. 96/2012

PËR QENDRËN E BOTIMEVE ZYRTARE

Në mbështetje të neneve 78 dhe 83 pika 1 të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Objekt i këtij ligji është përcaktimi:

a) i procedurës së botimit të Fletores Zyrtare në formatin e shkruar në letër, si dhe në formatin

elektronik;

b) i përgjegjësive të institucioneve të përfshira në procesin e botimit të akteve;

c) i rregullave për të garantuar mirëfunksionimin e Arkivit Elektronik të Akteve;

ç) i rregullave për organizimin dhe funksionimin e Qendrës së Botimeve Zyrtare.

Neni 2

Qëllimi

Ky ligj ka për qëllim përcaktimin e rregullave për botimin e ligjeve, të akteve normative të

Këshillit të Ministrave, ministrave dhe drejtuesve të institucioneve qendrore, vendimeve të Gjykatës

Kushtetuese, vendimeve për njësimin ose ndryshimin e praktikës gjyqësore të Gjykatës së Lartë, si dhe të

gjitha akteve të tjera, botimi i të cilave është i detyrueshëm me ligj, në funksion të bërjes së mundur të

hyrjes në fuqi të tyre, si dhe për të garantuar njohjen e legjislacionit dhe garantimin e së drejtës për

informim të personave fizikë dhe juridikë, si dhe institucioneve shtetërore.

Neni 3

Përkufizime

Në këtë ligj termat e mëposhtëm kanë këto kuptime: