Për administratën gjyqësore në Republikën e Shqipërisë

Lloji: Ligj

Fletore Zyrtare: nr. 55, datë 2013-04-17

LIGJ

Nr. 109/2013

PËR ADMINISTRATËN GJYQËSORE NË REPUBLIKËN E SHQIPËRISË

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti i ligjit

Objekt i këtij ligji është rregullimi i organizimit, funksionimit dhe i statusit të administratës gjyqësore, duke përcaktuar strukturën organizative, kompetencat funksionale, si dhe të drejtat, detyrimet e përgjegjësitë e nëpunësve të administratës gjyqësore.

Neni 2

Misioni

1. Misioni i administratës gjyqësore është kryerja e funksioneve në mbështetje të gjykatave të shkallës së parë dhe të apelit për realizimin me efektivitet të misionit të tyre të dhënies së drejtësisë, si dhe ofrimi i shërbimeve ndaj publikut.

2. Administrata gjyqësore, në përputhje me Kushtetutën dhe legjislacionin në fuqi, kryen veprimtari procedurale dhe veprimtari administrative.

Neni 3

Përkufizime

Në këtë ligj termat e mëposhtëm kanë këto kuptime:

1. “Administratë gjyqësore” është tërësia e nëpunësve që ushtrojnë funksione publike me natyrë procedurale apo administrative, si dhe funksione të shërbimeve mbështetëse në gjykatat e shkallës së parë dhe të apelit.

2. “Nëpunës civilë gjyqësorë” janë nëpunësit që ushtrojnë funksione publike me natyrë procedurale apo administrative, si dhe funksione të shërbimeve mbështetëse në administratën gjyqësore.