PËR ORGANIZIMIN DHE FUNKSIONIMIN E KONTROLLIT TË LARTË TË SHTETIT

Lloji: Ligj

Fletore Zyrtare: nr. 217, datë 2014-12-31

LIGJ

Nr. 154/2014

PËR ORGANIZIMIN DHE FUNKSIONIMIN E KONTROLLIT TË LARTË TË SHTETIT

Në mbështetje të neneve 81, 83, pika 1, dhe 162 deri në 165 të Kushtetutës, me propozimin e deputetit Erion Braçe,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Ky ligj përcakton rregullat që kanë të bëjnë me organizimin, funksionimin, detyrat dhe kompetencat e Kontrollit të Lartë të Shtetit në Republikën e Shqipërisë.

Neni 2

Qëllimi

Kontrolli i Lartë i Shtetit, nëpërmjet auditimeve, synon përdorimin me efektivitet, efiçencë dhe ekonomicitet të fondeve publike, pronës publike dhe asaj shtetërore, zhvillimin e një sistemi të përshtatshëm të menaxhimit financiar, kryerjen si duhet të aktiviteteve administrative, si dhe informimin e autoriteteve publike dhe publikut, nëpërmjet publikimit të raporteve të tij.

Neni 3

Përkufizime

Në këtë ligj, termat dhe shprehjet e mëposhtme kanë këto kuptime:

1. “Auditim” nënkupton veprimtarinë e auditimit, të kryer nga Kontrolli i Lartë i Shtetit, i cili përfshin auditimin e përputhshmërisë, auditimin financiar, auditimin e performancës, auditimin e IT-së, si dhe auditimin e kombinuar të tyre.

Në këtë ligj termi “auditim” ka të njëjtin kuptim me termin “kontroll” të përdorur në nenet 162, pika 1, 163 dhe 164, pika 1, shkronja “c”, të Kushtetutës.