Për efiçencën e energjisë.

Lloji: Ligj

Fletore Zyrtare: nr. 201, datë 2015-11-24

LIGJ

Nr. 124/2015

PËR EFIÇENCËN E ENERGJISË

Në mbështetje të neneve 78 dhe 83, pika 1, të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Qëllimi i këtij ligji është:

a) hartimi i rregullave dhe politikave kombëtare për nxitjen, promovimin e përmirësimin e

përdorimit efiçent të energjisë, me synim kursimin e energjisë dhe rritjen e sigurisë së furnizimit, si dhe

heqjen e pengesave në tregun e energjisë;

b) vendosja e objektivave kombëtarë të efiçencës së energjisë;

c) rritja e konkurrueshmërisë së operatorëve.

Neni 2

Objekti

Ky ligj rregullon marrëdhëniet ndërmjet autoriteteve shtetërore dhe personave fizikë dhe

/ose juridikë, publikë ose privatë, që ushtrojnë veprimtari në sektorët rezidencialë, të shërbimeve,

industrisë, transportit, bujqësisë, si dhe të gjithë sektorëve të tjerë të ekonomisë, për nxitjen e

përdorimit me efiçencë të energjisë dhe për zhvillimin e tregut për shërbimet energjetike.

Neni 3

Fusha e zbatimit

Ky ligj zbatohet për subjektet e mëposhtme:

a) personat juridikë, që ushtrojnë veprimtaritë e prodhimit, transmetimit, shpërndarjes dhe

furnizimit të energjisë;

b) personat fizikë dhe/ose juridikë, publikë ose privatë , që janë konsumatorë fundorë të

energjisë;