PËR AKUAKULTURËN

Lloji: Ligj

Fletore Zyrtare: nr. 207, datë 2016-11-04

LIGJ

Nr. 103/2016

PËR AKUAKULTURËN1

Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Ky ligj ka për qëllim të kontribuojë në nxitjen dhe zhvillimin e mëtejshëm të industrisë së

akuakulturës, nëpërmjet rritjes së konkurru-eshmërisë dhe përfitimeve në këtë sektor, duke respektuar

zhvillimin e ekuilibruar e të qëndrueshëm mjedisor në territorin e Republikës së Shqipërisë.

Neni 2

Objekti

Ky ligj përcakton bazën e nevojshme ligjore për ushtrimin e veprimtarisë ekonomike të prodhimit dhe

kultivimit të organizmave ujorë në fushën e akuakulturës në territorin e Republikës së Shqipërisë.

Neni 3

Përkufizime

Në këtë ligj termat e mëposhtëm kanë këto kuptime:

1. “Akuakulturë” është kultivimi ose mbarështimi i organizmave ujore si peshqit, molusqet,

krustacetë dhe bimët ujore nga personat fizikë ose juridikë, nëpërmjet përdorimit të teknologjive të

përcaktuara për të rritur prodhimin e tyre përtej kapaciteteve natyrore në mjedis, ndërhyrjes në ciklin e

tyre të plotë apo të pjesshëm, në një pjesë të përzgjedhur dhe të kontrolluar të territorit ujor dhe tokësor

në Republikën e Shqipërisë;

2. “Akuakulturë biologjike/organike” është aktiviteti që karakterizohet nga:

a) reduktimi i ndikimeve negative në mjedis;