PËR KRIJIMIN E AGJENCISË KOMBËTARE TË DIASPORËS

Lloji: Ligj

Fletore Zyrtare: nr. 232, datë 2017-12-28

LIGJ

Nr. 115/2017

PËR KRIJIMIN E AGJENCISË KOMBËTARE TË DIASPORËS

Në mbështetje të neneve 78 dhe 83, pika 1, të Kushtetutës me propozimin e Këshillit të

Ministrave,

KUVENDI

I REPUBLIKËS SË SHQIPËRISË,

VENDOSI:

KREU I

DISPOZITA TË PËRGJITHSHME

Neni 1

Objekti

Ky ligj përcakton krijimin, misionin, organizimin dhe funksionimin e Agjencisë Kombëtare të

Diasporës.

Neni 2

Misioni

Agjencia Kombëtare e Diasporës ka për mision zhvillimin dhe konsolidimin e bashkëpunimit

institucional me diasporën, nëpërmjet:

a) përmirësimit të pozitës së diasporës dhe mbrojtjen e të drejtave dhe interesave të saj, aty ku

gjendet;

b) ofrimit të ndihmës për ruajtjen e gjuhës dhe trashëgimisë kulturore kombëtare;

c) nxitjes së bashkëpunimit ekonomik ndërmjet vendit të origjinës dhe diasporës;

ç) bashkëpunimit për prosperitetin, paqen, mirëqenien, kulturën dhe solidaritetin shoqëror të të

gjithë kombit.

Neni 3

Përkufizime

Në këtë ligj termat e mëposhtëm kanë këto kuptime:

1. “Agjencia Kombëtare e Diasporës”, në vijim “Agjencia”, është organi shtetëror përgjegjës për

marrëdhëniet me diasporën.

2. “Diaspora” përfshin:

a) komunitetet e hershme shqiptare në botë;

b) çdo person i lindur në Shqipëri, që banon në mënyrë të përhershme jashtë kufijve të saj;

c) çdo person, me origjinë shqiptare, i lindur dhe që banon në mënyrë të përhershme jashtë

kufijve të Shqipërisë.