Për kujdesin alternativ në familje në Republikën e Shqipërisë

Lloji: Ligj

Fletore Zyrtare: nr. 9, datë 2026-01-13

LIGJ

Nr. 92/2025

PËR KUJDESIN ALTERNATIV NË FAMILJE NË REPUBLIKËN E SHQIPËRISË

Në mbështetje të neneve 78 dhe 83, pika 1, të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti i ligjit

1. Objekti i këtij ligji është përcaktimi i rregullave për kujdesin alternativ në familje për fëmijët

pa kujdes prindëror ose në rrezik për të humbur këtë kujdes, si një nga format e përkujdesjes

alternative ndaj fëmijëve, në përputhje me legjislacionin në fuqi për të drejtat dhe mbrojtjen e fëmijës

në Republikën e Shqipërisë.

2. Ky ligj përcakton rregulla për:

a) shërbimin e kujdesit alternativ në familje;

b) subjektet e përfshira në sistemin e kujdesit alternativ në familje;

c) kushtet, standardet dhe procedurat e ofrimit të kujdesit alternativ në familje;

ç) strukturat përgjegjëse publike dhe jopublike për kujdesin alternativ në familje;

d) të drejtat e fëmijëve që përfitojnë kujdes alternativ në familje;

dh) të drejtat e detyrimet e familjeve dhe të strukturave përgjegjëse për organizimin, zbatimin,

monitorimin e inspektimin e kujdesit alternativ në familje.

Neni 2

Qëllimi i ligjit

1. Qëllimi i këtij ligji është garantimi i ofrimit të shërbimit të kujdesit alternativ në familje në një

mjedis të përshtatshëm familjar për fëmijët në nevojë për përkujdesje e mbrojtje.