Për mbështetjen dhe zhvillimin e startup-eve

Lloji: Ligj

Fletore Zyrtare: nr. 49, datë 2022-03-31

LIGJ

Nr. 25/2022

PËR MBËSHTETJEN DHE ZHVILLIMIN E STARTUP-eve

Në mbështetje të neneve 78, 81, pika 1, dhe 83, pika 1, të Kushtetutës, me propozimin e

Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Qëllimi i këtij ligji është hartimi i një kuadri rregullator dhe institucional të favorshëm për

krijimin e zhvillimin e startup-eve dhe mbështetjen e ekosistemit të tyre, për nxitjen e kërkimit,

realizimit dhe përdorimit të ideve inovative, si dhe modeleve, produkteve dhe proceseve të reja,

të cilat sjellin risi në çdo fushë për zhvillimin ekonomik.

Neni 2

Objekti

Ky ligj përcakton rregullat bazë, procedurat, si dhe organet shtetërore kompetente për

vetëdeklarimin, mbështetjen, zhvillimin dhe monitorimin e startup-eve dhe të ekosistemit

mbështetës të tyre në Republikën e Shqipërisë.

Neni 3

Përkufizime

Në këtë ligj termat e mëposhtëm kanë këto kuptime:

a) “Ekosistem mbështetës për startup-et” nënkupton bashkëveprimin e individëve, startup-eve,

si dhe organizatave të tjera që veprojnë si lehtësues, të cilët bashkërisht veprojnë si inkubator për

krijimin e rritjen e startup-eve;

b) “Inkubim” është procesi i mbështetjes, përgatitjes, transformimit të idesë në model biznesi

dhe i zhvillimit të një startup-i në fazën fillestare të tij;

c) “Lehtësues të startup-eve” janë aktorët e ndryshëm të ekosistemit që ofrojnë programe dhe