PËR TELEKOMUNIKACIONET NË REPUBLIKËN E SHQIPËRISË

Lloji: Ligj

Fletore Zyrtare: nr. 18, datë 2000-11-07

LIGJ

Nr. 8618, datë 14.6.2000

PËR TELEKOMUNIKACIONET NË REPUBLIKËN E SHQIPËRISË

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Ky ligj rregullon veprimtarinë e telekomunikacioneve në Republikën e Shqipërisë dhe synon të mbrojë interesat publikë dhe të krijojë një mjedis rregullator transparent, që ndihmon nxitjen e investimeve dhe konkurencën e lirë.

Neni 2

Përkufizime

Për zbatimin e këtij ligji termat e mëposhtëm kanë këto kuptime:

1. “Administrimi i spektrit” është veprimtaria teknike, administrative dhe juridike për një përdorim të frytshëm të spektrit të radiofrekuencave në shkallë kombëtare dhe ndërkombëtare.

2. “Aksesi në Internet” është shërbimi, i cili mundëson aksesin në rrjetin dhe shërbimet e Internetit.

3. ”Interkoneksion” është lidhja fizike dhe logjike e rrjeteve publike të telekomunikacioneve që përdoruesit e shërbimeve publike të telekomunikacioneve të një operatori publik telekomunikacionesh, të lidhen ose të komunikojnë me përdoruesit e shërbimeve publike të telekomunikacioneve të një operatori tjetër publik telekomunikacionesh.