PËR AKREDITIMIN E LABORATORËVE TESTUES, KALIBRUES, ORGANIZMAVE CERTIFIKUES DHE INSPEKTUES NË REPUBLIKËN E SHQIPËRISË

Lloji: Ligj

Fletore Zyrtare: nr. 22, datë 2003-04-02

LIGJ

Nr.9024, datë 6.3.2003

PËR AKREDITIMIN E LABORATORËVE TESTUES, KALIBRUES, ORGANIZMAVE CERTIFIKUES DHE INSPEKTUES NË REPUBLIKËN E SHQIPËRISË

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Qëllimi

Ky ligj përcakton rregullat për krijimin dhe funksionimin e sistemit të akreditimit, përcakton fushat ku kryhet akreditimi dhe rolin e akreditimit në procedurat e vlerësimit të përputhjes me standardet dhe rregullat teknike.

Neni 2

Përkufizime

Në zbatim të këtij ligji, termat e mëposhtëm kanë këto kuptime:

1. “Akreditim" kuptohet procedura e njohjes zyrtare, nga një organizëm i autorizuar, të kompetencës së një organizmi të vlerësimit të përputhjes me standardet dhe rregullat teknike, për të kryer detyra të tilla, si testim, kalibrim, certifikim, inspektim.

2. “Autorizim" kuptohet dhënia e së drejtës për të kryer vlerësimin e përputhjes me standardet dhe rregullat teknike të produkteve, proceseve, shërbimeve në sferën e detyrueshme, organizmave publikë ose privatë, vendas ose të huaj, që kryejnë veprimtari në Republikën e Shqipërisë, nga ministritë dhe institucionet qendrore të fushës përkatëse.