Për nomenklaturën e mallrave dhe tarifën doganore

Lloji: Ligj

Fletore Zyrtare: nr. 105, datë 2005-12-31

LIGJ

Nr.9461, datë 21.12.2005

PËR NOMENKLATURËN E MALLRAVE DHE TARIFËN DOGANORE

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

1. Për të pasur një instrument të vetëm, që do të mundësonte administrimin në të njëjtën kohë të tarifës doganore, të statistikave të tregtisë së jashtme dhe të politikave të tjera, që lidhen me mallrat dhe lëvizjen e tyre, Këshilli i Ministrave miraton një nomenklaturë mallrash, e cila, nga këtu e më tej, do të quhet “Nomenklatura e Mallrave” (NM).

2. Nomenklatura e Mallrave bazohet plotësisht në Nomenklaturën e Kombinuar të Bashkimit Europian (CN) dhe do të përfshijë:

Nomenklaturën e Sistemit të Harmonizuar (SH) të Organizatës Botërore të Doganave;

nënndarjet, që i janë bërë nomenklaturës së SH-së, të quajtura ndryshe edhe “nënkrerë të NM-së”, të cilave u përgjigjet një nivel i caktuar i taksës doganore;

dispozitat paraprake, shënimet shtesë për seksionet, kapitujt dhe shënimet fundore për nënkrerët e NM-së.

3. Ngarkohet Këshilli i Ministrave të nxjerrë vendimin përkatës për përditësimin e Nomenklaturës së Mallrave me nivelet e tarifave doganore në fuqi, ku të përfshihen edhe nivelet e taksës doganore, kur është e mundur dhe njësitë statistikore plotësuese, si edhe informacione të tjera të nevojshme.