Për bashkëpunimin e publikut në luftën kundër korrupsionit

Lloji: Ligj

Fletore Zyrtare: nr. 37, datë 2006-05-02

LIGJ

Nr.9508, datë 3.4.2006

PËR BASHKËPUNIMIN E PUBLIKUT NË LUFTËN KUNDËR KORRUPSIONIT

Në mbështetje të neneve 78 dhe 83 pika 1 të Kushtetutës, me propozimin e Këshillit të

Ministrave,

KUVENDI

I REPUBLIKËS SË SHQIPËRISË

VENDOS I:

KREU I

DISPOZITA TË PËRGJITHSHME

Neni 1

Qëllimi

Qëllimi i këtij ligji është të nxisë pjesëmarrjen e publikut në denoncimin e korrupsionit, duke

mbrojtur e nxitur personat, të cilët denoncojnë praktikat korruptive të abuzimit me autoritetin publik.

Neni 2

Objekti

Objekt i këtij ligji është përcaktimi i rregullave, procedurave e përgjegjësive të zbatueshme në

institucionet shtetërore për denoncimin dhe regjistrimin e praktikave korruptive, si dhe shpërblimin e

mbrojtjen e personave që denoncojnë.

Neni 3

Përkufizimet

Për qëllim të këtij ligji, termat e mëposhtëm kanë këto kuptime:

1. “Institucion shtetëror” janë institucionet e administratës publike që pranojnë denoncimet

sipas këtij ligji dhe që në buxhetin e tyre kanë fonde të dedikuara për shpërblimin, sipas shkronjës “a”

të pikës 1 të nenit 14 të këtij ligji.

2. “Denoncim” është njoftimi i bërë pranë institucioneve shtetërore për praktika korruptive, që

personat kanë zbuluar, gjetur dhe për të cilat kërkohet ose duhet t’i nënshtrohen kontrollit shtetëror.

3. “Person” është personi fizik ose juridik, vendas ose i huaj.