PËR SHËRBIMIN E TRANSFUZIONIT DHE KONTROLLIN E GJAKUT, PRODUKTEVE TË TIJ DHE TRANSPLANTIMEVE

Lloji: Ligj

Fletore Zyrtare: nr. 25, datë 1995-12-12

LIGJ

Nr.8032, datë 16.11.1995

PËR SHËRBIMIN E TRANSFUZIONIT DHE KONTROLLIN E GJAKUT, PRODUKTEVE

TË TIJ DHE TRANSPLANTIMEVE

Në mbështetje të nenit 16 të ligjit nr.7491, datë 29.4.1991 “Për dispozitat kryesore

kushtetuese”, me propozimin e Këshillit të Ministrave,

KUVENDI POPULLOR

I REPUBLIKËS SË SHQIPËRISË

VENDOS I:

KREU I

DISPOZITA TË PËRGJITHSHME

Neni 1

Ky ligj ka për qëllim garantimin e sigurisë për të gjitha manipulimet që lidhen me gjakun,

produktet e tij dhe transplantet.

Neni 2

Ky ligj zbatohet për të gjitha manipulimet e gjakut, produkteve të qëndrueshme të tij dhe

transplantet.

Ky ligj nuk zbatohet për:

a) fabrikimin, shpërndarjen, magazinimin dhe regjistrimin e produkteve të qëndrueshme të

gjakut;

b) gjakun dhe produktet e tij që nuk destinohen për përdorim te njerëzit.

Neni 3

Në kuptim të këtij ligji:

a) gjak është gjaku i njeriut;

b) produkte të gjakut janë produkte që kanë si bazë gjakun;

c) produkte të paqëndrueshme gjaku janë produktet që përftohen direkt nga gjaku i njeriut ose

pas disa fazave të fabrikimit dhe që ndryshojnë me shpejtësi, pavarësisht nga veprimet e jashtme (p.sh.

përgatitja qelizore ose plazma);

ç) produkte të qëndrueshme gjaku janë produktet e përftuara në mënyrë industriale me disa

faza fabrikimi dhe me konservim të gjatë (p.sh. preparatet e koagulimit, albuminës dhe

imunoglobulinat);