PËR TEATRIN

Lloji: Ligj

Fletore Zyrtare: nr. 4, datë 2000-01-13

LIGJ

NR.8578, DATË 10.2.2000

PËR TEATRIN

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti

Objekti i këtij ligji është përcaktimi i parimeve të përgjithshme që rregullojnë marrëdhëniet e organizimit, të funksionimit dhe të zhvillimit të sistemit teatror kombëtar.

Neni 2

Përkufizime

Në zbatim të këtij ligji, termat e mëposhtme kanë këto kuptime:

a) “Teatër” kuptohet ajo çka ndodh në shfaqje të gjallë e të drejtpërdrejtë ndërmjet artistit teatror dhe spektatorit.

b) “Vepër teatrore” kuptohet krijimi i gjallë artistik i një teksti, platforme, partiture a libreti, të përfunduar dhe të mundshëm për t’u shfaqur për së gjalli dhe drejtpërdrejt në publik.

c) “Veprimtari teatrore” kuptohet krijimi, prodhimi, ekzekutimi, tregtimi dhe shfrytëzimi i veprës teatrore, zhvillimi i vlerave kombëtare teatrore, edukimi teatror dhe shërbimet e lidhura me këtë veprimtari.

ç) “Artistë teatrorë” kuptohen të gjithë ata, vepra e të cilëve është e paracaktuar të komunikojë për së gjalli dhe drejtpërdrejt me një auditor të caktuar.

E gëzojnë këtë cilësi si artistët dhe bashkëpunëtorët e veprës teatrore, edhe artistët që shfaqen në publik.